სკოლის დაწყება ბავშვის ცხოვრებაში ერთ-ერთი ყველაზე მნიშვნელოვანი ეტაპია. ეს არის დრო, როდესაც მოსწავლე ხვდება ახალ გარემოში, სადაც მას ელოდება როგორც თავგადასავლები, ასევე გამოწვევები. სწორი მომზადება განსაზღვრავს, თუ რამდენად წარმატებით გაივლის ის ამ გარდამავალ ეტაპს. ნიჭიერთა კერძო სკოლაში ჩვენ გვესმის, რამდენად დიდი როლი აქვს მშობლებისა და სკოლის თანამშრომლობას, ამიტომ გთავაზობთ პრაქტიკულ რჩევებს, რომლებიც თქვენს მომავალ პირველკლასელს დაეხმარება, თავდაჯერებულად შეხვდეს სკოლის პირველ დღეს.
რა უნდა გააკეთოთ სკოლის დაწყებამდე?
სანამ თქვენი პატარა მოსწავლე სკოლის ზღურბლს გადააბიჯებს, მნიშვნელოვანია, განუვითაროთ რამდენიმე ძირითადი უნარი, რომელიც მას სწავლის პროცესში დაეხმარება. აქ მოცემულია რამდენიმე მარტივი ნაბიჯი:
1. წიგნიერების განვითარება
საღამოობით წაუკითხეთ თქვენს მომავალ პირველკლასელს ზღაპარი ან მოთხრობა. მაგალითად, თუ თქვენი შვილი დაინტერესდა ცხოველებზე, აიღეთ წიგნი ცხოველების თავგადასავლებზე და ჰკითხეთ: „რომელი ცხოველია მისთვის ყველაზე საინტერესო და რატომ?“
ითამაშეთ რითმების თამაში: „ცეცხლისა და ყინულის ცეკვა“. თქვით: „მე ვარ ცეცხლი, ვცეკვავ ცხელა“, და სთხოვეთ ბავშვს გააგრძელოს, მაგალითად: „მე ვარ ყინული, ვცეკვავ ცივა!“ შემდეგ შეგიძლიათ ერთად იცეკვოთ – ცეცხლივით სწრაფად ან ყინულივით ნელა – და გააგრძელოთ;
წაახალისეთ საუბარი: როცა მაღაზიაში მიდიხართ, სთხოვეთ, აღწეროს, რას ხედავს გზად ან მაღაზიაში.
2. მათემატიკური საფუძვლები
დაითვალეთ ერთად: „მოდი, დავთვალოთ, რამდენი ვაშლია კალათაში!“
ითამაშეთ პაზლებით – ეს ავითარებს ლოგიკას. მაგალითად, 10-ნაწილიანი პაზლის აწყობა შესანიშნავი დასაწყისია.
გზაში ეძებეთ ციფრები: „რა ნომერია ამ ავტობუსზე?“
3. სწავლისადმი ინტერესის გაღვივება
თუ თქვენ ბავშვთან ერთად რაღაცას კითხულობთ ან ხატავთ, აჩვენეთ, რომ ეს თქვენც გახარებთ.
ისაუბრეთ იმაზე, თუ რა საინტერესო იქნება სკოლაში, და რა პასუხისმგებლობები ელის მას იქ ყოფნისას
სოციალური მზაობა – როგორ გავხადოთ პირველკლასელი თავდაჯერებული?
აკადემიური უნარების გარდა, პირველკლასელს სჭირდება სოციალური მზაობა, რათა მარტივად შეეგუოს სკოლის გარემოს.
თავდაჯერებულობა და დამოუკიდებლობა
ასწავლეთ მარტივი თვითდახმარება: ქურთუკის შეკვრა, ფეხსაცმლის შეკვრა, საკუთარი სივრცის დალაგება;
მიეცით მცირე დავალებები: „შეგიძლია, თავად აარჩიო, რომელი ფანქარი გინდა ხატვისთვის?“
გამოხატეთ სიყვარული: როცა ბავშვი რაღაცას მიაღწევს, მაგალითად,დამოუკიდებლად ააწყობს პაზლს, თქვით: „რა კარგად ააწყე პაზლი!“
ცნობისმოყვარეობა და მოტივაცია
ცნობისმოყვარეობა ბავშვის ბუნებრივი თვისებაა, რომელიც სწავლისკენ უბიძგებს, ხოლო მოტივაცია ამ ცნობისმოყვარეობას მიმართულებას აძლევს.
წაიყვანეთ ბავშვი ახალ ადგილებში – პარკში, მუზეუმში, ზოოპარკში – და წაახალისეთ კითხვების დასმა.
აჩვენეთ, რომ სკოლა ახალი აღმოჩენების ადგილია, სადაც ყოველი დღე რაღაც საინტერესოს მოიტანს.
თანამშრომლობა და თვითკონტროლი
სკოლა არა მხოლოდ სწავლის, არამედ სოციალური ურთიერთობების ადგილიცაა. პირველკლასელისთვის მნიშვნელოვანია, ისწავლოს სხვებთან ერთად მუშაობა და საკუთარი ემოციების მართვა.
წაახალისეთ ბავშვი, გაუზიაროს სათამაშოები ან საჭმელი სხვებს და ეთამაშოს, თუ სათამაშოს არ უნდა გაზიარება, ჰკითხეთ: „რას იგრძნობდი, შენი მეგობარი რომ არ გაგიზიაროს თავისი მანქანა?“
თუ თქვენი შვილი ხატავს, შესთავაზეთ: „მოდი, მე გავაფერადებ ხეს, შენ კი ყვავილებს – ერთად გამოგვივა ლამაზი სურათი!”
რატომ არის ეს ყველაფერი მნიშვნელოვანი?
მნიშვნელოვანია გვესმოდეს, რომ ბავშვის მომზადება სკოლისთვის არ გულისხმობს მისგან სრულყოფილი ცოდნის მოლოდინს, არამედ იმ ძირითადი უნარების გამომუშავებას, რომლებიც დაეხმარება მას სწავლის პროცესში ადაპტაციასა და წარმატების მიღწევაში. ჩვენ, ნიჭიერთა კერძო სკოლაში, დარწმუნებული ვართ, რომ მშობლებისა და სკოლის თანამშრომლობა არის ის საფუძველი, რომელიც ბავშვის განვითარებას ყველაზე მყარად უჭერს მხარს. როდესაც თქვენ მოგვიყვანთ თქვენს პატარას, ჩვენ მზად ვართ, გულითადად მივიღოთ ის, გავუხსნათ კარი ახალი აღმოჩენებისა და შესაძლებლობებისკენ, და უზრუნველვყოთ, რომ თითოეული დღე სავსე იყოს სიხარულით, თავდაჯერებულობითა და წინსვლით.
🌟 დარეგისტრირდი დღესვე 👉 nichiertaskola.edu.ge/registration